مصر بقى فيها شوية أزمات ...إنما ايه؟ مافيش بعد كده ...
لما قعدت أفكر لقيت إننا ممكن ندخل موسوعة الحاج جينيس من أحقر أبوابها
تعالوا نفكر مع بعض ... إيه نوعيات الأزمات اللي عندنا ...ونخش في ظلط
الأزمة الأولى: أزمة برباط مقاس خمسة وأربعين هافان
الغلاء والإرتفاع المهبول في الأسعار
ما أعرفش الناس هتعيش إزاي ... ما فيش حاجة ما غليتش
وما فيش مرتب يقدر يقف أدام الأسعار المجنونة دي ... واللي يجننك ان كل حاجة بتزيد بسرعة جنونيه
حلاق مثلا - مافيش هنا بقه لا تاجر تجزأة ولا تاجر جملة - يعني بيزود ليه ...؟ يقولك لأن كل حاجة غليت
يحسسك إنه إتجاه قومي ...
ويا سلام لو عايز تخنق نفسك أكتر ... وده متاح وعادي جدا
أدخل مترو مثلا وشوف اللحمة بكام وشكلها ايه...؟؟
وانت طبعا خلاص عايش على البرازيلي واللي الله أعلم باللي فيها ده لو انت لاقي تجيبها أساسا
وياسلام ... الفرخة بقت بتلاتين جنيه - الكيلو بسبعتاشر جنيه- أمال لو ماكانش عندها أنفلوانزا ومزكمة كانت هتبقى بكام...؟؟
واتفرس بقه ...الفول الناشف - طعام أهل المحروسة والسبب الرئيسي للحالة الزهنية الجامدة بتاعة المصريين - ارتفع سعره من أربعة لعشرة جنيه في شهرين ... طيب ... مش لو المصريين بطلوا الفول أو حتى قللوه... مش ده ممكن يأثر في مستوى الذكاء ويعمل طفرة جينية الحكومة مش قدها... مش لازم الدولة تخاف على نفسها ... الرد على كلامي انا عارفه كويس جدا ألا وهو ...
إن الحكومة مش حمارة ... هيه عارفه ان الناس في الأغلب هتلجأ لبديل أنيل من الفول وده هيعمل طفرة جينية عكسية هم محتاجينها في الخطة الخمسية الجاية وعندهم تجارب سابقة مع العيش
لما القمح غلي على الناس عملوا العيش من الذرة
يعني ممكن بكرة تلاقي أسرة من خمس أفراد بتشتري بعشرين جنيه طعمية - خمس حبات- وبعشرة جنيه درة عويجة ورغيفين من بتوع الفراخ - لأن العيش بقى أزمة بس أزمة إيه ... بوت وبرباط من الجمب وسودا زي النيلة-
طبعا انا بتكلم عن أسرة بسم الله ما شاء الله متيسرة الحال وعندها المقدرة تأكل طعميه مرة في السبوع
المهم خليك في مترو بجزمتك او بأزمتك المهلهلة وشوف اللي نفسك تأكله من فواكه أو بقالة أو أسماك ومللي عينك منه لأن بكره شكله كده ... مش حلو
وفي الأخر إشتري باكوا لبان وأخرج
شوفوا الفرق ...
وللحديث بقية طالما في العمر بقية
...يالله... ربنا يخرب بيوت الظلمة
